في الزمن ده كانوا دخلوا في رأس الدولة أن لازم أي واحد صوفي عاوز يدي الطريق أو عاوز يعمل مولد أو عاوز يعمل أي حاجة لازم يدخلوه في امتحان الأزهر ... إذا أخذ الشهادة يسمح له بإقامة حضره وإعطاء الطريق وكذا، وكذا وبعدين أنا كنت هناك طلبوا يجتمعوا على علشان أنا كنت بشرح إشارات الصوفية لكثيرين من ناس الطرق الصوفية ... صلينا الظهر في مولانا الحسين وجينا طالعين فيه واحد شيخ قاعد يدرس جوه جامع سيدنا الحسين (مش في المقصورة) وبعدين أولاد الطريقة قاعدين ورايا من كل الطرق. جاء المدرس بعد ما درس ... قال فيه فكرة عند الحكومة أن كل المشايخ بتوع الصوفية يعملوا لهم امتحان في الأزهر ... اللي ينجح في الإمتحان يدوا له الشهادة ويدي الطريق ويعمل حضرة ويعمل موالد ... واللي ما عندوش الشهادة يمنعوه أنه يزاول النظام الصوفي ... فالناس ورايا ضربوني في ظهري كام مرة وقالوا لي قول له ... قول له ... وبعدين قلت له يا مولانا ... قال لي نعم. ـــ أنتم بتدرسوا كام صنف من العلوم في الأزهر؟ ـــ 10،21 حاجة زي كدة. ـــ طبعًا مليان فن الحديث ... وفن التفسير وكذا، وكذا؟ أيوه. ـــ هل حصل أن عندكم رواق بتدرسوا فيه التصوف؟ ـــ لا. ـــ طبعًا أنتم ما بتعرفوش التصوف ... تمتحنوا ناسه كيف؟ فيه واحد يقدر يمتحن واحد في فن هو ما يعرفوش؟ الشيخ سكت. ـــ وبعدين قال هم الصوفية علماء؟ ــــ قلت له أصل العلماء هم الصوفية. ـــ تقدر تبين لي؟ ـــ جدًا. ـــ قول؟ ـــ أنت مش من خريجين الأزهر؟ ـــ اه. ــــ مذهبك أيه؟ ــــ مالكي. ـــ تاتك داهية (ضحك) مذهبك مالكي ولا تعرف أن العلماء هم الصوفية. ــــ العلماء هم الصوفية؟ ــــ أقول لك ... هل قرأن ابن عاشق وهو أصعب كتاب عندنا؟ (المالكين). ـــ اه. ـــ عبد الواحد بن عاشق. ــ أيوه. ــــ تعرف كتبه وقصته وتاريخه. ـــ لا.