أما اللسان يكون للبيان ومنه يكون القول عشان العقول، ويكون من الحروف كلمات ومن الكلمات جمل والفرق فى الفهم زى الحمار والجمل، وبصريح العبارة الكلام ليك يا جاره، فيه واحد يفهم بالإشارة والتانى ما تكفيه العبارة، واستخدام الحرف فى القول ليه أصول، ففى الكلام يكون الحرف تام أما القول يكون راس الحرف ليه مدلول وجسم الحرف ليه مفعول وذيل الحرف ملوش مدخول إلا فى حالة النزول والتسفل والحلول وربنا ينجى من الغول وأم الصبيان وأم سحلول، فحرف الألف فى الكلام ما يختلف ولكن فى القول يكون (أ ا) وتخفى جسمه (ل) وديله (ف) أما اللغات هى اللى نزلت بها الكتب المقدسة من السموات وأما كلام الخواجات ده يسموه لهجات وباقى اللغات هو تخاطب باقى الكائنات من الجن والوحش والطير والحشرات ومعاهم السمك والريح وباقى الحيوانات، كمان يأجوج وماجوج والصخر والجمادات، ومجمل القول يا ابن العم يكون الاسم منه الرسم عليه الوسم وبيه الفهم، يعنى المعانى فى الأوانى زى الشراب فى الدنانى والحمامات فى البنانى . ونقلب اللوح المرقوم للوح المعلوم اللى كان منه أم العلوم، وهيت لك علم الفلك اللى من غيره ما مالك ملك ولا سالك سلك، ظهرت منه الأنوار واتقدرت الأرزاق والأسرار و ... زحل شرى مريخه من شمسه فتزاهرت لعطارد الأقمار