دحية مش عشان شكلها من بره لكن عشان بتدحى لما يكسروها عشان يقلوها، وعشان كده جبل قاف محيط بالأرض من كل الجوانب ورسمته على الصينية زى الحرف (ق) ولكن كان هناك الفتحة اللى بين الراس والديل قفلها ذو القرنين على يأجوج وماجوج .. ونكمل بعدين عشان أنا تعبت وعلى روحى نعست .... وكان ياما كان ..
كان ياما كان يا سادة يا كرام ولا يحلى الكلام إلا بذكر النبى عليه الصلاة والسلام، وتمر الأيام والأعوام وما دايم إلا وجه الملك العلام خالق الأنام ومحيى رميم العظام، وكل الحوادث بإذنه، رازق الهاجع والناجع والنايم على سماخ ودنه، والمكتوب مفيش منه مهروب، ولكن ربنا لما فرق العقول كل واحد عجبه عقله، ولما فرق الأرزاق ولا واحد عجبه رزقه، إلا أخنوخ شال زاده وزواده فى كتفه، وبلاد تشيله وبلاد تحطه، لكنه صابر وعلى حمله قادر، وفى الهواجر نومه وصحوه، وعلى الوصف إللى وصفه جده شيث خطط أول خريطه عرفها الوجود مع اتجاه الشمس وهى طالعة تكون فى كفوفه وهى نازله تكون بين كتوفه، يسلك طريقه بين السهول والجبال ويجنب سبيله البحار على اليمين وعلى الشمال، وبنور البصيرة مع البصر وصل لغايته وعلى الصعاب انتصر، وصل لكهف العلوم وأخرج الألواح كل لوح يذاكره فى يوم.